食大閘蟹飲咩酒？(上篇)

九月圓臍十月尖，秋風起，除咗三蛇肥之外，大閘蟹一定係主角。今次唔係講點揀蟹，而係無論你食蟹公定蟹乸，有蟹無酒，相信好多老饕接受唔到！所以，今次就同大家分享吓食大閘蟹配咩酒。

首先，經典配搭，一定係花雕。花雕，喺黃酒的類別入面屬於半乾型(簡單D，即係微甜)，係紹興酒的一種(女兒紅、狀元紅其實都係紹興酒)，不過就係最頂級的種類，越陳越香。高年份的花雕酒，色澤呈深紅黃色，晶瑩剔透，酒香芬芳，酒體醇厚，餘味悠長。老實講，對花雕小弟認識唔深，配大閘蟹的話，如果有酒友一齊分享，我會去天香樓買。一斤裝(大概係一個啤酒樽咁多) $400左右。天香樓的花雕據稱係用30年左右的老酒去兌5年的新酒，配大閘蟹真係一流，相得益彰得嚟，又可以驅寒。

除咗中國黃酒，法國黃酒係另一個選擇。我無寫錯，你無睇錯，就係法國黃酒 Vin Jaune (法文意思係 yellow wine)。呢一種酒係產自法國東部的Jura 入面的 Chateau-Chalon區( 呢個係法定產區(AOC)名， 唔係酒莊名)，用當地的Savagnin 葡萄造的酒。佢特別的地方係會喺228升的酒桶靜置最少五年，而桶入面會留返一定的空間，比一層酵母生長出嚟。由於喺酵母未生長之前，酒會被氧化，而酵母生長出嚟之後，氧化停止，但酵母又會令酒的風味產生變化，最後的成品就會帶有蜜糖、發酵、杏仁、乾杏甫、鹹香、咖喱等等的風味。鹹甜交雜，又層次豐富的Jura Vin Juane，同又叫五味蟹的大閘蟹係好襯的。

飲開酒的朋友就會發現，Vin Jaune的造法同另一種酒好相似，就係西班牙的雪莉酒(Sherry)。雪莉酒有唔同的種類，配大閘蟹就會用乾型的雪莉— Fino 或者係Oloroso。雪莉酒必須喺西班牙的Jerez 區出產，可以用的葡萄品種有三種，而其中的Palomino 就會用做乾型雪莉酒。Fino 同上面講的Vin Jaune好相似，佢獨特的風味主要係來自氧化同埋酵母菌。Fino 的酒體輕盈，有豐富的杏仁、香草、麵粉團(發酵味道)、鹹香味。Oloroso 係深啡色而且酒精度較高度(17%-22%)的酒，因為造酒的時候只有少量或者無酵母層的形成，氧化帶來的風味十分突出，有拖肥、香料、合桃同皮革味。Oloroso 比Fino 有更佳的複雜性，可以話更似花雕的味道，所以相對地更可以配襯到大閘蟹。

仲有其他酒款同大閘蟹夾到的，下一篇再同大家分享！

睇完即刻想買返D好嘢食，CLICK 呢條LINK 啦：GL 網店 — 葡萄酒系列